2015 ROADTRIP

16 Desember

Dag 1

So  op die Gelofte dag vat ek en vroutjie die pad Noord Kaap toe. Keimoes toe. Die begin van ons 2015 Road trip! Ek wonder hoeveel mense kry dit reg om op tyd te ry as hulle met vakansie gaan. Ek bedoel nou jy beplan om 5 uur te ry maar kom eers kwart voor 6 weg. Nie dat dit veel saak maak as jy op vakansieis nie! Dis nou nie dat ons op ‘n spesifieke tyd iewers moet inboek nie.

Die Westransvaal is hartseer droog. Dit lyk sleg. Die beeste se ribbes lyk soos vinecianblinds. Hartseer sê ek! Van Vryburg af lyk dit nie veel beter nie. Lyk amper soos die Kalahari se rooi sand duine. ‘n Ent voor Kuruman sien ek ‘n naambord wat lees: “ Washington”. ‘n Perdekar stop met ‘n stof wolkonder die naambord maar eks te laat om die die foto te neem. Die naambord word egter verewig! Wonder wat die Withuis sou sê van die stand van sake in die Washington!

By Katho draai ons in. 2 Ma se myn masjienerie begroet ons. Helse groot goed wat die aarde se maag omkrap!

Skuins voor 6 ry ons Keimoes binne.’n Lushof van ‘n tuin begroet ons by Rian en Launa se huis.Dit sou verseker die Withuis se geodkeuring weg gedra het! Die huis met die stoep. ‘n Stoep wat wes kyk. Oor wingerdedie verte in! En sommer 2 windpompe! Met ‘n soutrib op die vuur en ‘n Koue  glasie Boplaas Stoepsit Sauvignon Blanc  in die hand sien ons die son sak in die weste.